कैलाली । कैलालीको गेटामा सञ्चालनको तयारीमा रहेको दशरथ चन्द स्वास्थ्य विज्ञान विश्वविद्यालयमा उपकुलपति नियुक्ति प्रक्रिया अन्योलमा परेको छ। दुई पटकसम्म दरखास्त आह्वान गर्दा पनि योग्य उम्मेदवार नपाएपछि मन्त्रालयले तेस्रो पटक पुनः आवेदन खुलाएको हो।

शिक्षा, विज्ञान तथा प्रविधि मन्त्रालयले पहिलो पटक कात्तिक १६ गते १५ दिनको समयसीमा राखेर उपकुलपति पदका लागि आवेदन माग गरेको थियो। तर उक्त अवधिमा कुनै पनि दरखास्त नपरेपछि दोस्रो पटक पाँच दिनको छोटो म्याद तोक्दै पुनः आवेदन आह्वान गरियो। दोस्रो चरणको म्याद मङ्सिर ५ गते सकिएको थियो।

यतिबेलासम्म उपकुलपति नियुक्त भई विश्वविद्यालयमा कार्यभार सम्हाल्नुपर्ने भए पनि प्रक्रिया अघि बढ्न सकेको छैन। मन्त्रालयले अहिले तेस्रो पटक आवेदन खुलाए पनि यस पटक योग्य उम्मेदवार पाइन्छ कि पाइँदैन भन्ने विषयमा नै शङ्का व्यक्त गरेको छ।

यस विषयमा शिक्षा, विज्ञान तथा प्रविधिमन्त्री महावीर पुनले समेत केही समयअघि गेटास्थित विश्वविद्यालयका लागि उपकुलपति खोज्न कठिन भइरहेको सार्वजनिक रूपमा स्वीकार गर्नुभएको थियो। उपकुलपतिविहीन अवस्थाले विश्वविद्यालय सञ्चालनको तयारीमा थप ढिलाइ हुने चिन्ता बढ्दै गएको छ।